Inoqarfinnik misissueqqissaarineq

2010-mi Inuussutissarsiuteqarnermut Suliffeqarnermullu Naalakkersuisoqarfimmi sulisut piffissami 1990-imiit 2009-ip tungaanut ineriartornermik pingaarnertut samminnittumik nalunaarusiorsimapput; `Nunatsinni kommunini inoqarfinni killiffiit´. Misissueqqissaarineq Kommuneqarfik Sermersuumut tunngasoq aamma pigineqarpoq. Tassunga ilanngullugu misissueqqissaarinermit pingaarutillit arlallit qulaani misissueqqissaarinermik taaneqartumik tunngavissiinissaq immikkoortiterinissaq siunertaralugu eqikkarneqassapput:

  • Kommune tassaavoq piffissami nunatsinni kommunini nunatsinnit tamarmiit illoqarfimmut nuassorfigineqarnerpaaq aamma inoqarfinni innuttaasut amerlassusiat tamakkulu allanngornerat imminnut ataqatigiilluinnarput, tassami inoqarfiit mikinerusut innuttaat nalinginnaasumik ikilinerpaasarmata
  • Paamiut illoqarfinni tassatuaagunarpoq piffissami 20 %-it sinnerlugit innuttaasunik ikileriarfiusoq, uffa Sermiligaaq immikkuullarissumik nunaqarfinni kisiartaalluni 19 %-ingajannik innuttaqarnerulernermigut innuttai amerliartortut
  • Pilersuisut (65-it sinnerlugit ukiullit 15-iniit 64-inut ukiullit ilaattut) Paamiuni-eqqaanilu amerlanersaapput Tunumilu ikinnerssaallutik, uffa Tunumi inuusuttut ukioqanngitsuniit 15-inik ukiullit taamatut amerlanersaasut

Paamiut Nuullu eqqaanni nunaqarfinni arnat angutinut sanilliullutik ikinnersaapput, uffa Sermiligaami, Isertumi Tasiilamilu 2009-mi amerlanersaasut
2009-mi innuttaasunit tamarmiusunit sulisinnaasut procentinngorlugit Tasiilami ikinnersaapput, uffa Nuummi amerlanersaasut
Tunumi inoqarfinni tamani sulisinnaasut tamarmiusut 25 %-ii 50.000 koruunit inorlugit akileraarutaasussanik isertitaqarput
Kommunimi nunaqarfinni aningaasat 20 %-ii piniarnermit, aalisarnermit savaateqarnermillu pisuupput (nuna tamakkerlugu kisitsisit aamma taamaapput), tunisisartut ukioqqortusiartuaarput piffissamilu tunisat ikiliartuaarsimapput, Paamiuni Arsummilu tunisat eqqaassanngikkaanni
Sermiligaami, Kuummiuni, Kulusumi Tasiilamilu isertitat pingajorarterutaat sinnerlugit isumaginninnermi ikiorsiissutineersuupput tamannalu misissueqqissaarinermi ajornartorsiutaanerpaatut isigineqarpoq
Tasiilap eqqaani nunaqarfinni illut bolistøttekkoortillugit illuutigisat aserfallatsaaliortariaqarnersaapput.