Immikkoortortat qitiutinneqartut

Nutsertuarneq inuttusiartortitsivoq Tasiilallu ungasinnerusoq isigalugu illoqarfittut ineriartortinnissaa pillugu periusissaqarnissaq pisariaqartinneqarpoq. Illoqarfik ullumikkut, ukiuni 12-ini tulliuttuni, inissialiassatut naatsorsuutigisaasunut 225 missaanniittunut inissaqartitseqqatarpoq. Illoqarfik siunissami inuussutissarsiornikkut ilinniarnermilu pingaaruteqalissagaluarpat inissiat saniatigut attuuffiit assigiinngitsut allat aamna inissaqartinneqartariaqarput.

Ungasinnerusumut isigisumik illoqarfiup pilersaarusiorneqarnissaanut periusissaq

Illoqarfiup inissiaqarfiit naammattut pilerinartullu tunniussinnaasariaqarpai, massakkullu avannaata tungaani atugassiissutigineqartut anori silalu eqqarsaatigalugit pitsaanerpaajunngillat. Illoqarfiup kujammut kimmullu ineriartorfissaa nunamik aamma imermik pilersuiffiup eqqaani isumannaallisaanermut killeqarfimmik killeqarmat illoqarfiup ungasinnerusoq isigalugu ineriartortinneqarnissaanut periusissap, piviusorsiortumik ineriartortinneqarsinnaasunik tikkuussisumik, aallartinneqarnissaa assut pisariaqartinneqarpoq.

Illoqarfiup ungasinnerusoq isigalugu ineriartorfigisinnaasaani siullermik imeqarfiup/tatsip nassakkut inissisimaffia aamma mittarfiup siunissami inissisimaffissaa apeqqutaalluinnarput. Nukissiorfiit illoqarfiup imermik aamma inaallagissamik pilersorneqarnera pillugu aamma Namminersorlutik Oqartussat mittarfiup inissisimaffissaa pillugu oqaloqatigineqalissapput, ungasinnerusoq isigalugu piviusorsiornerusumik periusissaqarnissaq angujumallugu.

Kommunimi immikkoortoqarfittut kisiartaalluni illoqarfiup ineriartortinnissaanut periusissaq avataaniit pisut soorlu aatsitassarsiornerit apeqqutaatinnagit oqaasertalersorneqarsinnaavoq. Tassa imaappoq, periusissaq erseqqissumik, paatsoorneqarsinnaanngitsumik aamma patajaatsumik oqaasertalersorneqassasoq. Patajaannerulersikkumallugu ineriartortitsinermut periusissami illoqarfioreersup periarfissaqarfiisigut piujuartitsineq eqqarsaatigalugu attanneqarsinnaasumik eqitertinneqarnissaanik malitseqartinneqassaaq.

Illoqarfiup immikkoortui marluk qitiusoqarfiit

Illoqarfiup immikkoortui qitiutinneqartut tassaapput nunap immikkoortui, tamaani maannakkut ineriartorfiusinnaasutut oqaluuserisassaasut, aamma kommuneqarfimmit naliliiffigineqartut kommunimut pilersaarusiornissami immikkut pilersaarusiorfigineqarnissamut qitiutinnissamik pisariaqartitsisut. Illoqarfiup immikkoortui qitiutinneqartut maannakkut illoqarfioreersup eqikkarneqarneqarnissaanut ataatsimut pilersaarusiornissamit aallaaveqarpoq. Tulliuttut illoqarfiup qeqqani immikkoortortut qitiutinneqartussatut toqqagaapput:

  • Illoqarfiup qeqqa orniginartoq – illoqarfiup inoqannginnersartai marluk qitiutillugit illoqarfimmik kusassaaneq
  • Tasiilap kujataa – immikkoortortap illuliorfigineqarsimasup pitsanngorsarnissaa aamma nutaamik sanaartornissaq