Kommunimi sumiiffinni assigiinngitsuni innuttaasut amerlassusiisa nikerarnerat

Kommunimi illoqarfinni nunaqarfinnilu innuttaasut amerlassusiisa agguataarneqarneranni 1977-imiit ullumikkumut piffissani naatsorsuiffiusinnaasuni amerlassusiat nikerarujoorsimasut takuneqarsinnaapput, tassa piffissami Nuummi innuttaasut 100 %-it sinnerlugit amerleriarsimapput, massa nunaqarfinni innuttaasut taamaaqataannik 50 %-it sinnerlugit ikileriarsimasut. Nuannariinnarlugu oqartoqarsinnaavoq piffissami meeqqat illoqarfinni nunaqarfinnilu inunngorsimasut ullumikkut Nuummi najugaqartut.

Matuma ataani kommunimi sumiiffiit assigiinngitsut matumalu kingorna innuttaasa amerlassusiisa nikerarnerannik misissorneqartussat takuneqarsinnaapput.

Nuuk-eqqaanilu (nunaqarfiit Qeqertarsuatsiaat Kapisillillu ilanngullugit) innuttaasut tamakkerlutik 17 %-inik amerleriarsimapput tamannalu Nuummi innuttaasut amerliartornerinnaannik pissuteqarpoq. Nuummut tunngatillugu innuttaasuni ukioqatigiikkuutaani tamani amerleriartoqarsimavoq, pingasuniit arfinilinnut ukiullit eqqaassanngikkaanni, tamakkumi piffissami 18 %-inik ikileriarsimammata, nunaqarfinni innuttaasut 27 %-inik ikilisimasut. Piffissami utoqqaat 65-it sinnerlugit ukiullit amerleriarnersaallutik 80 %-inik amerleriarsimapput. Akerlianik nunaqarfinni Nuup eqqaaniittuni ukioqatigiikkuutaat tamarmik ikileriarsimapput, aamma ukioqanngitsuniit 16-inut ukiullit ikileriarnersaallutik 50 %-it sinnerlugit ikileriarsimapput.

Paamiut-eqqaanilu (nunaqarfiit Arsullu ilanngullugit) innuttaasut nalinginnaasumik 27 %-inik ikileriarsimapput. Nunaqarfinni ikileriarnersaasimapput (43 %) Paamiunilu ikileriaataat ikinnerulaarlutik (19 %). Paamiuni innuttaasuni ukioqatigiikkuutaani tamani ikileriartoqarsimavoq, 65-it sinnerlugit ukiullit eqqaassanngikkaanni, tamakkumi 23 %-inik amerleriarsimagamik. Ukioqanngitsuniit arfinilinnut ukiullit ikileriarnersaallutik 43 %-it missaannik ikileriarsimapput.

Tasiilaq-eqqaanilu (nunaqarfiit Sermiligaaq, Isertoq, Kulusuk, Tiniteqilaaq aamma Kuummiut ilanngullugit) innuttaasut 4 %-inik amerlerialaarsimapput tamannalu Tasiilami innuttaasut amerleriarnerannik taamaallaat pissuteqarpoq, tassami nunaqarfinni innuttaasut katillugit 23 %-inik ikileriarsimammata. Tasiilami innuttaasuni ukioqatigiikkuutaani tamani utoqqaat 52 %-inik amerleriaateqarlutik amerlinerpaasimapput, uffa nunaqarfinni Tasiilap eqqaaniittuni innuttaasuni ukioqatigiikkuutaani tamani ikileriartoqarsimasoq, utoqqaat eqqaassanngikkaanni, tamakkumi 7 %-inik amerleriarsimammata.

Ittoqqortoormiit-eqqaanilu, tassani nunaqarfiit Uunarteq, Itterajivit aamma Nerlerit Inaat piiffissami inuerussimapput. Taamaalilluni sumiiffimmi Ittoqqortoormiit kisimi inoqarpoq, tassanilu innuttaasut piffissami 20 %-inik ikileriarsimapput. Tamanna innuttaasut ukioqanngitsuniit 16-inut ukiullit 21 aamma 43 %-inik ikeriarnerannik pissuteqarpoq, akerlianilli piffissami utoqqaat 65-it sinnerlugit ukiullit amerleriarujussuarlutik, inuit 13-it, 108 %-inik amerleriarsimasut.