Aqquserngit

Nunaminertat suli atorneqalinngitsut aqqusinernut attavilerneqassapput aamma aqquserngit naammaginartut qulakkeerneqassapput. Aqquserngit immikkoortunut sisamanut agguataagaapput:

Aqquserngit pingaarnerit illoqarfiit ilaannut ataasiakkaanut atasut. Aqquserngit qamutinit motoorilinnit oqimaatsunit aqqutigineqakkajuttarput. Pisuinnaat sikkilertullu aqqutaat immikkoorput. Aqquserngit assiaquteqanngillat aamma biilerluni tamakku aqqutiginiaraanni sukkanerpaamik nal. ak. 40 imaluunniit 60-issersortoqarsinnaavoq.

Aqquserngit pingaannginnerit illoqarfiit ilaasa iluini inissiaqarfinnut ataasiakkaanut atasut. Aqquserngit tamakku biilinit angallaffigineqartorujussuupput najukkamilu biilinut taamaallaat aqqusiniullutik. Aqquserngit assiaquteqanngillat immaqalu aamma tamaanaqquttarnissaq killeqartinneqarpoq aamma biilerluni tamakku aqqutiginiaraanni sukkanerpaamik nal. ak. 40 imaluunniit 60-issersortoqarsinnaavoq.

Najukkami aqquserngit inissiaqarfinni inissianut ataasiakkaanut atasut. Aqquserngit najukkamiittunit taamaallaat aqqutigineqartarput taamaattumillu angallattoqarpallaarneq ajorpoq. Angallattut akuleriiusinnaapput immikkoorsinnaallutilluunniit. Tamakkunuunakkoorniaraani taamaallaat nal. ak. 40-ersortoqartarpoq.

Inissianut aqquserngit immikkoortut ilaannut ataasiakkaanut atasut angallaffigineqarpiarneq ajortut. Aqqusinikkoortut akuleraarput. Inissianut aqquserngit “Pinnguartarfittut aneerasaartarfittullu” pilersinneqarnissaat aamma aqqutigalugit taamaallaat nal. ak. 15-ersorfigineqarsinnaasunngorlugit sananeqarnissaat siunnersuutigineqarpoq. Aqquserngit tamakku sukkanerusumik aqqutigineqarsinnaajunnaarsillugit ilusilersorneqassapput.

Aqqusinissanik pilersaarusiornerni aqquserngit nutaat assinginik taamaallaat atassuserneqassapput imaluunniit killilikkanik atassuserneqassapput.
Aqqusinernut nunaminertanik atugassiinernut aqquserngit, pisuinnaat aqqutaat, kussiat, ledningit apummillu niffat il.il. ilaatinneqarput. Aqquserngit nutaat – pissutsit immikkut ittut iluaqutaanngippata – imatut silissusilerlugit, kussiat ilanngullugit, atugassiissutigineqassapput:

  • Aqquserngit pingaarnerit: 25 m
  • Aqquserngit pingaannginnerit: 16 m
  • Najukkami aqquserngit: 12 m
  • Inissianut aqquserngit: 10 m

Aqquserngit pingaarnerit pingaannginnerillu illoqarfinnut ataasiakkaanut ilutsit pingaarnerit pillugit nunap assingani takuneqarsinnaapput.

Nunaqarfinni aqqusinernut, aqqusianut il.il. – pissutsit immikkut ittut ajornartitsinngippata – 8 meterisut silitsigisunngorlugit kussiartalerlugillu assigisaannillu atortulerlugit atugassiissutigineqassapput.