Nunaminertamik atugassiinermi atorneqarnissaanut piffissaliussat

Imm. 1. Sanaartornermut nunaminertamik atugassiinermi, sanaartornissamut akuersissummik piumasaqaateqarfiusuni, annerpaamik ukiuni marlunni atuisinnaasutut atugassiisoqartarpoq. Suliniut aallartinneqarsimappat aamma nunaminertamik atuinermi sulisoqarpat nunaminertamut pineqartumut nunaminertamik atugassiinissamut piffissarititaasoq kingulleq Kommunalbestyrelsip ukiut ataasiakkaarlugit sivitsortarsinnaavaa, sivisunerpaamilli ukiuni sisamani, Pilersaarusiorneq aamma nunaminertat atorneqartarneri pillugit Inatsisartut inatsisissaat nr. 17, 17. novembari 2010-imeersumi § 45a takuuk.

Imm. 2. Sanaartornissamut nunaminertamik atugassiinermi, sanaartornissamut akuersissummik piumasaqaateqarfiusuni, sanaartornissamut akuersissutip nalunaarutigineqarneraniit kingusinnerpaamik ukioq ataaseq qaangiutsinnagu aallarnisarneqariissaaq.

Imm. 3. Nunaminertanik atugassiinermi, sanaartornissamut akuersissummik qinnuteqarfiusussaanngitsuni, atugassiisoqartarpoq nunaminertamut qinnutigineqartumut aamma siunertaanut akuerisamut nunaminertamik atugassinneqarnerup ulluaniit kingusinnerpaamik ukioq ataaseq qaangiutsinnagu nunaminertap atulerneqarsimanissaa piffissaliullugu.
Sunngiffimmi illuaqqanut tunngatillugu killissarititaasoq kingulleq ukiunut marlunnut sivitsorneqarsinnaavoq.

Imm. 4. Nunaminertamik atugassiineq nunaminertaq piffissaliunneqartup iluani atorneqanngippat nalunaarutitaqanngitsumik atorunnaarsinneqassaaq.

Imm. 5. Kommunalbestyrelsimit immikkut pisoqartillugu imm. 1-3-mi piffissaliussatut aalajangersakkat sivitsorneqarsinnaapput, nalilerneqarpat, nunaminertamik atugassinneqartup pilersaarusiaq naammassisinnaagaa nunaminertamik atugassinneqarnermi atugassaritinneqartut malillugit, allakkatigut tunngavilersuilluni qinnuteqarsimappat piffissap taassuma sivitsuiffiup iluani.

Imm. 6. Kommunalbestyrelsimit aamma imm. 1-3-mi sanaartornermut annertuunut aamma teknikkimut tunngasunut piffissaliunneqartut sivitsorsinnaavai, suliassaq suliarineralu ukiuni marlunni naammassineqarsinnaanngippat.