Illoqarfiit pingaarnersaannut periusissaq

Nuuk periarfissat illoqarfigaat

Illoqarfitsialaasugut aammalu siuariartornissamut ineriartornissamullu periarfissaqartorujussuusugut tamarmik isumaqatigiissutigaat. Periarfissat avatangiisitsinniipput. Issittoq ukiuni kingullerni nunarsuarmi isiginiarneqartorujussuanngornikuuvoq. Periarfissat maannakkut atorluassavavut. Aamma unammilligassaqarpoq. Qanoq iliuuseqanngikkutta pisortat aningaasaqarnerat siunissami ajornartorsiulissaaq. Suliffeqarfinnik namminersortunik amerlanerusunik pilersitsisariaqarpugut. Aningaasarsiortoqassaaq, taamaalilluta inuuniarnitsinni atugassarisat qaffasilluartinnissaannut siunissami aamma akissaqarniassagatta.

Maannakkorpiaq pitsaasumik inissisimavugut. Aningaasaqarniarnerput pitsaasuuvoq, aningaasaliinissamullu periarfissaqarpugut, aammali ilisimavarput aningaasaqarniarneq piffissami sivisunerulaartumi tatisimaneqalissasoq. Taamaammat eqqortunut peqqissaarluta aningaasaliisassaagut. Siuariartornissami sinaakkutinut pitsaanerusunut nutaanik isertitsissutaalertussanut pisariillisaanernullu aningaasartuutitsinnik ikilisitsisinnaasunut aningaasaliissaagut. Taakku marluk siunissami atugarissaarnerup qulakkeernissaanut Kommuneqarfik Sermersuullu aningaasaqarnermi namminersornissaanut tapersiissapput. Siuariartornermi periarfissatta atorluarnissaannut annertuunik aningaasaliinissaq pisariaqarpoq. Kommune piareersimavoq, aammali aningaasaliissutit annertuut avataaneernissaat ilisimaarilluarparput.

Illoqarfiit pingaarnersaannut periaasissat pingaaruteqartunik marlunnik oqariartuuteqarfiusut

Oqariartuut siulleq tassaavoq, Nuup illoqarfiit pingaarnersaattut ineriartornerani aningaasaqarnerup inuillu ineriartornissaannik tunngaveqassasoq. Ilisimavarput taakku marluk imminnut atassasut. Inuit isumalluutit piginnaasai qaffassarutsigit aningaasatigut siuariartornissamut tunngaviliissaagut, aningaasatigullu siuariartorneq inuit siuariartornissaannut aningaasaliinissamut akissaqalissalluta. Aningaasatigut inuillu siuariartornerat ataatsimut ingerlanneqassapput assigiimmillu annertuumik pingaaruteqarlutik. Inuiaqatigiinnit amerlasuut avataani inissisimapput. Tamanna inunnut ataasiakkaanut aammalu illoqarfitsinnut inuiaqatigiinnullu ajornartorsiutaavoq. Amerlanerusut suliffeqassapput, amerlanerusut ilinniagaqassapput, amerlanerusut suliffeqarfi mmik aallartitserususseqassapput, amerlanerusullu eqqumiitsuliornermi, kulturimi nutaanillu pilersitsisarnermi peqataassapput. Ataatsimut oqaatigalugu immitsinnut samminerussaagut.

Oqariartuutip aappaa tassaavoq, Nuup inerisarneqarneranut aallaaviit nunanit tamaneersuussapput illoqarfimminngaanneersuussallutillu. Ineriartortitsiniarnitsinni illoqarfik, nuna tamakkerlugu nunallu tamat ilannguttassavavut. Illoqarfiit pingaarnersaattut mikisutut aamma nunami namminermi aningaasaqarniarneq annikitsuutillugu nunat tamat akornanni pisunik isiginninniartariaqarpugut. Kalaallit unaanni suut tamaasa tunisassiarisinnaanngilagut. Siunissami atugarissaarniarutta nunanit tamanit periarfi ssarititanik atorluaanissamut pikkorissuusariaqarpugut. Iloqarfitsinni inuunerissaarneq pilersissavarput piujuartitsinermillu eqqarsarluta. Inuussutissarsiornerullu ineriartornissaanut aningaasaliisinnaasullu maannarnissaannut sinaakkusiussaagut.

 

Illoqarfiit pingaarnersaat Nuuk pillugu periaasissaq

Read the English version of the Capital Strategy here: Capital Strategy for Nuuk