Aalajangersaanerit

Imm. 1. Qinnuteqartup nunaminertamut nunaminertamik atugassinneqarnissamut qinnuteqareernerup kingorna atugassinneqaruni, siunertamut aalajangersimasumut nunaminertap atornissaa pillugu, nunaminertamik inniminniineq tassaavoq Kommunalbestyrelsip qinnuteqartumut nalunaarutigisassaa - tassa imaappoq piumasaqaatiliunneqartut malinneqarsinnaapput.

Imm. 2. Nunaminertamik inniminniineq nunaminertamut atuisussaatitaanermik nassataqartitsinngilaq - piffissamili aalajangersimasumi pilersaarutip paasiniarnissaanut qinnuteqartumut periarfissaassaaq, tassa imaappoq piffissami pineqartumi nunaminertaq qinnuteqartumut allamut tunniunneqarsinnaanngilaq.

Imm. 3. Nunaminertamik inniminniineq sivisunerpaamik qaammatinik arfinilinnik sivisussusilerneqartarpoq. Nunaminertat sanaartornernut annertuunut imaluunniit sanaartugassanut inniminnerneqarnerinut sivisunerpaamik qaammatit arfinillit piffissalerneqarnerinut aalajangersaasoqarsinnaavoq. Inniminniinermi piffissaliunneqartutut aalajangersarneqartoq qaangiuppat, nunaminertamik inniminniineq ilimasaareqqaartoqarani atorunnaarsinneqassaaq.

Imm. 4. Immikkut ittumik pisoqartillugu Kommunalbestyrelsip § 3-mi killiliunneqarsimasut sivitsorsinnaavai, nunaminertamik inniminniisimasoq suliassamik naammassinnissinnaasutut nalilerneqarpat kiisalu nunaminertamut inniminniinermut piumasaqaatit naammassisinnaappagit, tassa killissarititaasup qaangiutinnginnerani sivitsornissaanut allakkatigut tunngavilersukkamik qinnuteqarsimappat.

Imm. 5. Kommunalbestyrelsip nunaminertamut killilimmik angissusilimmik atuisinnaatitaaneq nunaminertamik atuisinnaatitaasumut aalajangersimasumut ukiut marluk tikillugit inniminnersinnaavaa, tamatuma atuisussaatitaasup nunaminertamik atuinissamik qinnuteqaatigineqartumut tunngatillugu avatangiisinut sunniutinik nalilersuisoqartussaappat imaluunnit inuiaqatigiinni piujuartitsisuuneranik nalilersuisoqartussaappat, Pilersaarusiorneq aamma nunaminertat atorneqartarneri pillugit Inatsisartut inatsisissaat nr. 17, 17. november 2010-imeersumi § 44a takuuk.

Imm. 6. Kommunalbestyrelsip immikkoortup ilaa pillugu kommunimut pilersaarummut tapiliussassatut siunnersuusiortoqartillugu immikkoortup ilaanut pineqartumut atuisinnaatitaaneq nunaminertamik atugassinneqarnissamik qinnuteqaateqartumut ukiut marluk angullugit inniminnersinnaavaa, Pilersaarusiorneq aamma nunaminertat atorneqartarneri pillugit Inatsisartut inatsisissaat nr. 17, 17. november 2010-imeersumi § 45a takuuk.