Sermiligaaq

2015-mi januaarip aallaqqaataani nunaqarfimmi najugaqavissut 200-iupput. Inuttussutsikkut 7-16-ini ukiulinni marlunnik ikileriaateqarpoq 65+-inillu ukiullit amerleriaateqarlutik. Inuttussutsikkut taamatut ikileriaateqarneq taamaaginnarnissaa naatsorsuutigineqarpoq.

Pingaarnertut iluseq

Inissiaqarfiit

Nunaqarfimmi 70-it missaannik inissiaqarpoq, taakkunannga 20-it missaanniittut inoqanngillat, tassalu 28%-ii.

Inuttussutsikkut ineriartorneq tunngavigalugu kommunalbestyrelsimit Sermiligaami nunaminertanik nutaanik inissianut siunertalinnut atugassiisoqarnissaa pisariaqanngitsoq nalilerneqarpoq. Piffissami pilersaarusiorfiusumi inissianik pitsanngorsaanerit, ingitserinerit inissianillu allatut ilusilersuinerit – innuttaasut peqataatillugit – ingerlanneqassapput.

Nunaqarfiup inissiaqarfii avannaata aamma kujataata tungaani naapertuuttumik inissisimapput, tamanna qiterpasissumiippoq umiarsualiveqarluni immikkoortoqarlunilu ataatsimoorussanik. Nunaqarfiup qeqqata kitaani 2 ha-ip missaannik annertutigisumik nunaminertamik inniminniisoqarpoq, piffissap pilersaarusiorfiusup iluani inissialiorfiusinnaasumik. Taakku saniatigut inissiaqarfioreersuni inissiat ataasiakkaat naleqqussarlugit inissinneqarsinnaapput.

Ataatsimorussaqarfiit

Nunaqarfiup qiterpasissuata tungaani kangerliumarngup eqqaa siunertanut ataatsimoorussanut atugassanngortinneqarpoq ilaatigullu umiarsualivik, pisiniarfik, quit, amernik tunitsivik, allakkerivik, atuagaateqarfiup immikkoortua kiisalu katersortarfik fritidsklubbilu inissisimallutik. Ataatsimoorussat nutaat qiterpasissumi inissinneqassapput taamaalilluni nunaqarfimmi katersuuffittut tamanna atorneqalerumaarluni.

Inuussutissarsiuteqarfiit

Sermiligaap umiarsualiviani mikisumik tunitsiveqarpoq aamma nunaqarfiup kangiani tarajorterivik ingitsigassaqqissoq panersiivittalik inissisimallutik.

Kuummiut peqatigalugit Sermiligaaq aalisarnerup iluani periarfissalerujussuuvoq. Kommunalbestyrelse isumaqarpoq tunitsivittut periarfissanik annertusaanikkut qaleralinnik suluppaakkanillu aalisarneq annertunerulersisinneqarsinnaasoq. Tunitsivik qaleralinnik tunisassiorfittalik pilersinneqassappat imermik pilersuineq peqatigitillugu aaqqiivigineqartariaqarpoq.

Nunaminertat sanaartorfiunngitsut ataatsimoorussat iliveqarfiillu

Iliveqarfitoqqat pigiinnarneqarnissaat kissaatigineqarpoq, iliveqarfillu nutaaq peqatigalugu nunaminertamut sanaartorfiunngitsumut inissinneqarlutik. Iliveqarfik ukiumi ilungersunartuusarpoq taamaattumillu ilerrit ukiumi uninngatinneqartarnerat illersorneqarsinnaasumik isumagineqartariaqarlutik.

Angallanneq, teknikkimut avatangiisimullu tunngasut

Helistop nunaqarfiup kujataata tungaani inissisimavoq.

Aqquserngup 400 meterit missaanniittup nunaqarfiup atuuffiinut naapertuuttumik aqquteqarnissaa qulakkeerpaa.

Nunaqarfik nunaqarfiup qeqqani inissisimasumit innaallagissiorfimmit innaallagissamik pilersorneqarpoq. Innaallagissiorfik piffissami pilersaarusiorfiusumi allineqarnissaa pisariaqartinneqanngilaq.

Imermik pilersuineq nunaqarfiup avannaatungaani tatsimit imeqarfimmit, imermut aqqummit aamma ukiumi imermut tankimit 1.390 m3-iusumit kuutsitsisarfilimmit pivoq. Taseq imeqarfik kaajallallugu palleqqusaannginneranut killeqarfimmik aalajangersagaqarpoq.

Tankeqarfioreersullu eqqaa 50 meterinik killeqarfilerlugu aalajangersaavigineqassaaq.