Aqqusineeqqat ilusaat

Nuummi pisuinnarnut sikkilertunullu atukkat pitsanngorsarnissaat kommunalbestyrelsimut anguniagaavoq pingaartinneqarluartoq, illoqarfillumi pisuinnarnut sikkilertunullu aqqusineeraqarpoq inerisarluarsimasunik ingerlalluartunillu.

Piffissami pilersaarusiorfiusussami Nuummi aqqusineeqqat pisuinnarfiusut sikkilertarfiusullu pitsanngorsarneqarnissaat sulissutigineqassaaq. Nuummi aqqusineeqqat pisuinnarfiusut sikkilertarfiusullu ataqatigiinnissaasa qulakkeerneqarnissaat aallunneqassaaq, aqqusineeqqat pioreersut siunertaqartumik ataqatigiissinneqarnissaat anguniarnerisigut.

Nuummi aqqusineeqqanik pisuinnarfiusunik sikkilertarfiusunillu ataqatigiissunik pilersitsinissamut uiggiullugu illoqarfiup qeqqani eqqaanilu aqqusineeqqat pisuinnarfiusut sikkilertarfiusullu pioreersut pitsanngorsarneqarnissaat sulissutigineqassaaq. Imanerup aqqusinertut pisuinnarfiusutut atuunnera pitsanngorsarneqassaaq, taamallu H.J. Rinksvej aamma Aqqusinersuaq sinerlugu illoqarfiup pisuinnartuinut sikkilertuinullu pissutsit pitsanngorsarneqassallutik.

Nuummut pingaarnertut aaqqissuusaanerup nutaamut atatillugu sissakkut sissaq sinerlugu aqqusineeqqamik pilersitsinissaq pilersaarutaavoq ilaatigut peqqinnartumik neqerooruteqarnissaq ilaatigullu aaqqissuusaanerup iluani pisuinnarnut assigisaannullu pingaaruteqarnera pillugu. Sissakkut aqqusineeraq sissaq sinerlugu ingerlassaaq, taamaalilluni Nuummi sissap killinga assigiinngisitaartoq misigisassaqartitsissaaq. Sissaq tamaat atuarlugu angalaffiusinnaanngussaaq, taamaalillunilu sumiiffiit sanaartorfiusussaanngitsut aamma angalaarfigineqarsinnaalissallutik. Illoqarfimmi immikkoortuni nutaani sissakkut aqqusineeqqanut nunaminertanik qulakkeerinissaq pilersaarusiorneqarpoq.