A: Inissiaqarfiit

Inissiaqarfinnut inissiaqarfioreersut inissiaqarfiillu nutaat ilaatinneqarput. Ilutsimi pingaarnermi nunaminertat inissianut assigiinngitsunut tamakkununngalu ataatsimut atortulersuutit, soorlu biilinut inissiisarfiit, uningaartarfiit pinnguartarfiillu, atugassiissutigineqartarput.

Inissiat ammasut pukkitsut (A1)
Ammasut pukkitsut imatut paasineqassapput; ilaqutariinnut ataatsinut illut aamma ilaqutariinnut marluinnut illut/affarleriit amerlanerpaamik marlunnik quleriillit. Ilaqutariinnut ataatsinut illu tassaavoq illu ataaseq ilaqutariinnullu marluinnut illu/affarleriik marlunnik inissiartalik.

Inissianut ammasunut pukkitsunut attuumassuteqartillugit inissiamut toqqaannartumik attuumassuteqartumik annerpaamik 50 m2-isut annertutigisunik naatsiiviliornissamut, ammasumik aneerasaartarfiliornissamut assigisaannillu sananissanut nunaminertanik atugassiisoqarsinnaavoq. Naatsiiviit portunerpaamik 1,2 meterisut portutigisunik ungaluukkersorneqassapput.

Inissianut ataasiakkaanut atasunik illuliorneq pillugu malittarisassani sumiiffik pillugu ungasissusissatut piumasaqaatigineqartut naammassineqarsimappata nunaminertatut katillugit 30 m2-isut annertutigisunik biiliisiviliortoqarsinnaavoq, quliinnakkamik biiliisiviliortoqarsinnaavoq, quiliortoqarsinnaavoq, naatitsivinnik illuliortoqarsinnaavoq, qulisanik aneerasaartarfiliortoqarsinnaavoq il.il. nuna, ikuallattoqarnerani ungasissusissat eqqaamiullu isikkiviisa tamanna ajornartinngippassuk taamaallaat nunaminertamik atuinissamik tunniussisoqarsinnaavoq.

Inissiat imminnut qanittut pukkitsut (A2)
Inissiat imminnut qanittut pukkitsut imatut paasineqassaaq; illut uilukutsukkuutaat immikkuullarissullu portunerpaaffimmikkut pingajuat avillugit quleriillit.

Inissianut imminnut qanittunut pukkitsunut atasunik annerpaamik 50 m2-isut annertutigisunik nunaminertatut katillugit 25 m2-isut annertutigisunik illumut toqqaannartumik atasunik naatsiiviliortoqarsinnaavoq, ammasumik aneerasaartarfiliortoqarsinnaavoq il.il. Naatsiiviit portunerpaamik 1,2 meterisut portutigisunik ungaluukkiorneqassapput.

Inissianut ataasiakkaanut atasunik illuliorneq pillugu malittarisassani sumiiffik pillugu ungasissusissatut piumasaqaatigineqartut naammassineqarsimappata nunaminertatut katillugit 30 m2-isut annertutigisunik biiliisiviliortoqarsinnaavoq, quliinnakkamik biiliisiviliortoqarsinnaavoq, quiliortoqarsinnaavoq, naatitsivinnik illuliortoqarsinnaavoq, qulisanik aneerasaartarfiliortoqarsinnaavoq il.il. nuna, ikuallattoqarnerani ungasissusissat eqqaamiullu isikkiviisa tamanna ajornartinngippassuk taamaallaat nunaminertamik atuinissamik tunniussisoqarsinnaavoq.

Illut uilukutsukkuutaat sukumiisumik nalilersuisoqareerpat qummut sammisunik avissaarfilersorneqassapput.

Quleriinnik inissialiat (A3)
Quleriinnik inissialiat imatut paasineqassapput; aqquserngup sinaani inissiat, inissiaqarfissuanngorlugit inissialiat aamma illut immikkuullarissut pingasunik amerlanernilluunniit quleriillit.

Akuleraartunik inissiaqarfik (A4)
Akuleraartunik inissiaqarfiit ammasunik-pukkitsunik, imminnut qanittunik-pukkitsunik aamma quleriinnik inissiat akuleraartunik nassuiarneqarput.
Akuleraartunik inissiaqarfimmi, kommunalbestyrelsimi nunaminertap allatut atorneqarnerata ajornartinngikkaa naliliisoqarpat, naatsiivinnut nunaminertanik atugassiisoqarsinnaavoq, immikkoortut ilaasa ataasiakkaat inissaqassusii aalajangiusimaneqarpata. Naatsiiviit portunerpaamik 1,2 meterisut portutigisunik ungaluukkiorneqassapput.

Tasiilami inissiaqarfinni sanaartukkat
Nunaminertap tamakkerluni sanaartorfigineqannginnerani nutaanik sanaartorneqassaaq, isaterlugit imaluunniit ilutsimi pioreersumi immiinertut.
Igalaat qangaanilli atorneqartartunik qisuaqqanik assiaqutaqartinneqassapput.

Inissiaqarfinni nunaminertat sanaartorfigineqanngitsut
Nunaminertat sanaartorfigineqanngitsut siunertanullu allanut atugassiissutigineqarsimanngitsut sunngiffimmi ataatsimut sammisassaqarnernut taamaallaat aaqqissuunneqarlutillu atorneqassapput. Inissialiortiternermi meeqqat pinnguartarfissaannut nunaminertanik atugassiisoqassaaq. Nunaminertami atugassiissutigineqartumi pinnguartarfiit inissiat atorneqalinnginnerini sananeqassasut piumasaqaatigineqarsinnaavoq.

Nunaminertanik sanaartorfigineqanngitsunik atuinermi Kommuneqarfik Sermersuumi umiatsianik inaalitsiveqarneq aamma qitsuuteqarneq qimmiuteqarnerlu pillugit malitassat ileqqoreqqusallu sukkulluunniit atuuttut atuupput. Containerinik inaalitsinerit pillugit aalajangersakkat nunaminertanik atugassiinertigut aalajangersarneqartarput.

Inissiaqarfinni suliffeqarfiit
Immikkoortut ilaanni inissianut siunertaqartuni suliffeqarfinnik niuertarfinnillu mikinerusunik piumasaqaatit tullinnguuttut makku naammassineqarsimappata kommunalbestyrelsip tamakkuninnga ingerlatsinissaq akuersissutigisinnaavaa:

  • Suliffeqarfik illumi najugaqartumit ingerlanneqassaaq.
  • Suliffeqarfik immikkoortup ilaani inissiaqarfittut isikkua aserornagu ingerlanneqassaaq, tassunga ilanngullugu allagartarsualersornikkut qullilersornikkullu.
  • Suliffeqarfik eqqaamiorisanut soorlu putsumik tipimillu akornusersuutaassanngilaq.
  • Suliffeqarfik biilinut inissiisarfeqarnermi malunnaatilimmik pisariaqartitsinerunermik malunnaateqassanngilaq.
  • Suliffeqarfik immikkoortup ilaani meeqqeriviliornissamut akornutaassanngilaq.

Tasiilami inissiaqarfinni suliffeqarfiit
”Unnuiffissanik Ullaakkorsiutitorfiusinnaasunik” sanasoqarsinnaavoq imaluunniit Illooreersuni / sanaartugaareersuni aaqqissuussisoqarsinnaavoq.

Nuummi inissiaqarfinni umiatsianik inaalitsiviit
Paamiuni, Tasiilami aamma Ittoqqortoormiini inissiaqarfinni umiatsianik inaalitsiveqarneq
Illoqarfinni nunaqarfinnilu allani inissianut / illunut attuumassuteqartumik inissiap / illup eqqaani umiatsiamik ataatsimik 26 fodsitut angitigisumik, anginerpaaffia, inaalitsisoqarsinnaavoq.

Inissiaqarfinni meeqqeriviit
Immikkoortut ilaanni inissianut siunertaqartuni piumasaqaatit tullinnguuttut makku naammassineqarsimappata kommunalbestyrelsip meeqqeriviliornissat akuersissutigisinnaavai:

  • Meeqqerivik immikkoortup ilaani inissiaqarfittut isikkua aserornagu ingerlanneqassaaq, tassunga ilanngullugu allagartarsualersornikkut qullilersornikkullu.
  • Meeqqerivik eqqaamiorisanut soorlu putsumik, tipimik aqqusinertigullu angallannermut akornusersuutaassanngilaq.
  • Meeqqerivik biilinut inissiisarfeqarnermi malunnaatilimmik pisariaqartitsinerunermik malunnaateqassanngilaq.

Inissiaqarfinni suliat allat
Inissiaqarfinni nunaminertat sanaartorfigineqanngitsut, illut najugaqarfigineqartut, illut ataatsimoorussat sumiiffiullu teknikkikkut pilersorneqarneranut atortulersuutit naleqqussarneqarsinnaapput.

Inissiaqarfinni inissianut ataasiakkaanut aqqutit qulakkeerneqassapput, ilaatigut imermik pilersuinerit aamma eqqakkanik aallertarnerit eqqarsaatigalugit.