Atugassaritinneqarsinnaasut

Imm. 1. Inissiaqarfinni (A) sanaartorfissagissaanermut aningaasartuutit sanaartorfissatut atugassanngortinneqartut annerpaamik sanaartorfigineqarnisaat malillugit agguataarneqassapput.

Imm. 2. Inuussutissarsiuteqarfinni (B) sanaartorfissagissaanermut aningaasartuutit inuussutissarsiuteqarfiit annertussusii malillugit agguataarneqassapput.

Imm. 3. Immikkoortut qiterisaqarfittut siunertalinnut (C) sanaartorfissagissaanermut aningaasartuutit sanaartorfissat annerpaamik sanaartorfigineqarnissaat malillugit agguataarneqassapput.

Imm. 4. Immikkoortuni ataatsimoorussaqarfiusuni (D aamma E) sanaartorfissagissaanermut aningaasartuutit sanaartorfissiat annerpaamik sanaartorfigisinnaasaat malillugit agguataarneqassapput.

Imm. 5. Imm. 1-4-mi aalajangersagaqaraluartoq sanaartorfissagissaanermut aningaasartuutit agguataarnissaanut tunngaviit immikkoortup aalajangersaavigineqartup iluani akiliuteqarnissamut malittarisassat immikkut ittumik aalajangersaavigineqarsinnaapput, pissutsit immikkut ittut taamatumani tunngavilersorneqarlutik nalunaarutigineqartillugit.

Imm. 6. Nunaminertamik inniminniisimasoq sanaartorfissagissaasuussappat, nunaminertamik inniminniinermut atatillugu piumasaqaateqartoqarsinnaavoq.

Imm. 7. Sanaartorfissagissaanermut nammineq akiliutissaq kingusinnerpaamik akilerneqarsimassaaq Kommuneqarfik Sermersuup ullormi nunaminertamik atugassiinerani. Kommuneqarfik Sermersooq pisinnaavoq nunaminertamik atugassiinnginnermi akiliisinnaassuseqarnerup uppernarsarneqarnissaa piumasarissallugu. Nunaminertamik inniminnikkamik atugassinneqarnermi sanaartorfigissaanermut nammineq akiliutissat paasissutissiissutigineqassapput.

Imm. 8. Illut pioreersut, kingusinnerusukkut kuuffissuarnut attavilerneqartut, kuuffissuarmut attavilersinnermi sanaartorfissagissaanermut nammineq akiliutissanik akiliissapput.

Imm. 9. Nunaannarmi (immikkoortut K-O) assersuutigalugu illuaraliornermut atatillugu sanaartorfissagissaaneq sanatitsisut ataasiakkaat akisussaaffigivaat.