M: Immikkoortut ilaat savaateqarfittut, nunaleriffittut, imarmiunik tunisassiorfittut, orpinnik tunisassiorfittut, qeqertatut qimmilivittut il.il. atugassiissutigineqartut.

Immikkoortut ilaat uumasuuteqarfittut nunaleriffittullu atugassiissutigineqartut pingaarnertut sanaartukkanut aamma savaateqarfimmut, nunalerinermut, imarmiunik tuniassiornermut, orpinnik tunisassiornermut il.il. nunaminertanullu eqqaaniittunut attuumassuteqartunullu atatilluinnarlugit atugassiissutigineqartarnerat ilisarnaataavoq. Allatut oqaatigalugu namminersorluni inuussutissarsiutit pisuussutinik uumassusilinnik tunngaveqartut naapertorlugit sanaartortoqarsinnaavoq, atortulersuusersortoqarsinnaavoq allatullu nunaminertanik atuisoqarsinnaavoq.
Immikkoortut ilaanni tamakkunani namminersorluni inuussutissarsiutinik allanik pilersitsisoqarsinnaanngilaq. Immikkoortut ilaanni M-ini attaveqaatinik teknikkikkullu pilersuutinik assersuutigalugu aqqusinertigut pitsaasumik angallannissakkut aqquteqarnernik pinngitsuuisinnaanngitsunik atortulersuutitalinnik ataasiakkaanik sanaartugaqartarnera ilisarnaataavoq. Taamaattumik immikkoortut ilaanni M-ini illunut atortulersuutinullu atasunik taamatut pilersuutinik sanasoqarsinnaavoq, tamakkunanilu aamma namminersorluni inuussutissarsiuteqarnermi ukioq naallugu najugaqarfigineqarsinnaasunik aappaa avillugu quleriinnik, 7,5 meterit assigaat, sanaartortoqarsinnaavoq. Killilimmik amerlassusilinnik aamma tamakku amerlassusiisa immikkoortut ilaasa pingaarnertut atorneqarnerannut allannguinngippata sunngiffimmi illuaraqarsinnaavoq, aasarsiortarfinnik illoqarsinnaavoq, piniartarfeqarsinnaavoq kiisalu aniguiniarnissamut illuaraqarsinnaavoq.

Uumasuuteqarnermut nunalerinermullu atasunik immikkoortut ilaanni sanaartukkanut tunngatillugu namminersorluni inuussutissarsiuteqarfimmit illumit illuaqqamut qaninnerpaaffissaq tassaavoq 60 meter. Tamatuma saniatigut illuaqqat imminnut minnerpaamik 6 meterinik ungasissuteqartillugit sananeqassapput.
Immikkoortut ilaanni atortulersuutinut sanaartukkanullu attuumassuteqartunik puttasuliortoqarsinnaavoq, aqqusinniortoqarsinnaavoq, aqqusiortoqarsinnaavoq aqqusineeraliortoqarsinnaallunilu. Aamma immikkoortut ilaasa ataasiakkaat pilersorneqarnerannut innaallagissamut imermut, telemullu attavilersuisoqarsinnaallunilu kuuffissualersortoqarsinnaavoq. Imermik milluaassutinut imikumillu kuutsitsinissamut atortulersuusiorneq Naalakkersuisunit aatsaat akuersissummik pisoqareerpat pissapput.

Immikkoortut ilaat M-it imatut agguataagaapput:

• M1: Nunalerineq (uumasuuteqarneq nunalerinerlu)
• M2: Aalisakkanik pisanillu suliareqqaarinnittarfik
• M3: Qeqertat qimmiliviit

M1: Nunalerineq (uumasuuteqarneq nunalerinerlu)
Immikkoortut ilaat nunalerinermut atugassiissutigineqartut imatut paasineqassapput; nunaminertat uumasuuteqarnissamut aamma grønsaginik naatsiiassanillu naatitsinissanut akuerineqarsimasut. Immikkoortut ilaanni tamakkunani nunalerinermut attuumassuteqartunik soorlu illunik naatitsivinnik, maskinaasivinnik assigisaannillu sanaartortoqarsinnaatitaavoq.

M2: Aalisakkanik pisanillu suliareqqaarinnittarnerit
Immikkoortut ilaanni tunisassiassanik suliareqqaarinissanut atugassiissutigineqartuni namminersorluni inuussutissarsiuteqartutut annikinnerusunilli aalisakkanik neqinillu tunisassiassanut panertitsiviliortoqarsinnaavoq pujooriviliortoqarsinnaallunilu aamma amernik tunisassiassanik suliarinneqqaartarfiliortoqarsinnaavoq.

M3: Qeqertat qimmiliviit
Immikkoortut ilaanni qimminik paarinninnernut /pilersuinernut attuumassuteqartuni qeqertani mikinerusunik taamaallaat sanaartortoqarsinnaavoq.