Imeqarfiup eqqaa

Tatsip imeqarfiup eqqaani annikitsunik illuliorfissanik immikkoortunik ineriartortitsinissaq periarfissaqarpoq, taakku ataatsimut illoqarfiup qeqqata ungasinngisaanik ineqarfittut orniginartutut pilersinneqarsinnaapput. Sumiiffiup ineriartortinneqarnissaanut piumasaqaataavoq maannakkut tatsip imeqarfiusut Nuup imermik pilersorneqarneranut ilaajunnaartinneqarnissaa.

Sumiiffik Nuummi qorsooqqittutut/sunngiffimmi ornigassatut qitiutinneqarpoq. Ilaatigut Inussiviup eqqaani suliniutit assigiinngitsut pilersaarutigineqarpoq, tamakkununnga ilaallutik illoqarfiup qeqqanut aamma seminariap eqqaanut / Nuutoqqamut aqqusinneeqqanik pilersitsinissat. Taamaattumik ataatsimoortumik pilersaarusiortoqarnissaa pisariaqarpoq, taanna atorlugu suliniutit assigiinngitsut tamarmik ataqatigiissaarneqassammata. Tamakku tamaani pilersaarutigineqartut aamma qulakkeerinnittussat orsooqqittutut/sunngiffimmi ornigassatut attaveqaatit aserorneqannginnissaannik. Tamatumani oqaatsit pingaarnerit tassaassapput eqiterunneq pitsaassusilik.

Immikkoortoq ineqarfissanut pingaarnernut marlunnut avinneqarsinnaavoq, orninneqarsinnaassallutik C. E. Jansensvejikkut aamma Kissarneqqortuunnguakkut. Illuliorfissat taakku marluk agguaqqinneqarsinnaapput tassa sumiiffiit ilaat tatsip imeqarfiup tikinneqarsinnaaffiata killingata avataaniikkamik, ilaallu killeqarfiup iluaniillutik. Sumiiffimmik ineriartortitsinissap ilaanut apeqqutaavoq imeqarfiup atorunnaarsinneqarnissaa, maannakkut pilersaarutaasut malillugu 2020-ip missaani pisussaasoq.

Imeqarfiup atorunnaarsinneqarnerata kingorna sumiiffik imeqarfiup eqqaaniittoq illoqarfiup qanittuani sunngiffimmi ornittagassatut ineriartortinneqarsinnaavoq, tamatumani qulakkeerneqassaaq sumiiffimmi illuliornerup sumiiffiup periarfigissaarneranik innarliinnginnissaa tamanna illoqarfiup eqqaa qorsooqqissutut ornigassanut ilanngunneqarniassammat.