Nunarsuup Qeqqani / Nuup Qeqqani

Ukiuni makkunani Nuummi unamminartunik suliassartarpassualimmik pissanganartortarpassualimmillu allanngoriartortoqarpoq. Ilaatigut pisortat inissiaateqarfiutaat annertunerit arlallit annertuumik allanngortiterneqartussaapput ilaatigullu Nuuk nunatsinnik qitiutitsinerulernermi takussutissaavoq, taamaattumillu nalinginnaasumik suliassanut siunissami takkunnissaannik naatsorsuutigineqartunut nalinginnaasumik killissaliissuulluni. Nuummi sanaartukkatigut killiliussat Nuup illoqarfittut oqimaaqatigiissutut illoqarfimmi ineriartortitsinissami nalinginnaasumik periarfissanik pitsanngorsaaffiujuartutut ineriartortinneqarnissaanut aalajangiisuupput. Taamaalilluni sutigut tamatigut ataatsimoortumik aaqqiissutissanut piujuartitsinernullu nutaanik piumasaqaateqartoqarpoq tamannalu aamma suliassaavoq annertooq ilisimasaqarnissamik sulisoqarnissamillu piumasaqaatitalik. Suliassaq assigiinngitsunik suliallit politikerillu partinit assigiinngitsuneersut ataqatigiissarinissaannik piumasaqaatitaqarpoq – suliassaq politikikkut qitiutitsinissamik piumasaqaatitalik.

Taamaattumik Kommuneqarfik Sermersuumi Namminersorlutik Oqartussani sulisut suleqatigalugit Tuujummut aamma Blok P-mut tunngatillugu ataatsimoortumik pilersaarusiortoqarsimavoq - NUNARSUUP QEQQANI // NUUP QEQQANI. Atlantikoq ikaarlugu suleqatigiittoqarnerata kingunerisaanik pilersaarusiortoqarpoq siunnersortillu tullinnguuttut makku siunnersuinerisigut pilersaarusiaq suliarineqarpoq; Dahl & Uhre arkitekter (Tromsø) aamma TNTnuuk A/S. Tamakku saniatigut MDH Arkitekter (Oslo), Fantastic Norway (Oslo), 42 architects + Regional Associates (London), Asplan Viak Landskap (Oslo) M:ARC aamma Arkitekti (Nuuk) pilersaarusiap ineriartortinneqarneranut pingaarutilimmik ikiuussimapput. Innuttaasut soqutigisaqaqatigiillu arlalippassuit pingaarutilimmik periuseqarluni ingerlaavartumik oqaloqatigalugit pilersaarusiortoqarpoq.

Suliassami tunngaviusumik piumasaqaat tassaavoq sumiiffiup sanaartukkatigut inuttullu avatangiisai immikkut qitiutillugit sulisussaqarluarluni sanaartorfigineqarnissaata anguniarneqarnissaa. Kisianni soorunami piujuartitsisumik ataatsimoortumik pilersaarusiaq taakkuinnarnik imaqanngilaq aamma ataatsimoortumik pilersaarut taamatut ittoq sanaartukkanik allanngortiterinissaannarmut tunngasinnaanngilaq. Sumiiffiup illoqarfiup ilaanut allanut, nunaminertanut inuussutissarsiuteqarfiusunut, inuit ineqarneranni pissutsinut, najugaqartut inissitsiternerannut, aningaasanut tunngasunut politikikkullu suliassanut unamminartunut anguniakkanullu attuumassuteqarneranut siunnerfeqarluartumik inissisimasussaavugut.

Taamaattumik nunatsinni illoqarfiit pingaarnersaata illoqarfimmut tassanilu innuttaasunut ineriartornissamut periarfissanik nutaanik pilersitserunneq aallaavigalugu ataatsimoortumik pilersaarusiortoqarpoq – tamatuma anguneqarnissaanut pilersaarummi apeqqutit eqqortut apeqqutiginiarneqarput akiniarneqarlutillu. Taamaattumik Nuuk qanoq ililluni najoruminarninngorsinnaanersoq, suliffigiuminarninngorsinnaanersoq najugaqarfigiuminarninngorsinnaanersorlu aamma sumiiffik qanoq ililluni illoqarfimmi nutaaliortunit angerlarsimaffiusinnaanersoq paasiniarsimavarput. Sumiiffik taanna illoqarfimmut qanittumiittoq inissaaleqinerinnarmik aaqqiiffiusinnaanngilaq – sumiiffimmi aamma allanik peqartariaqarpoq aamma illoqarfiup ilaata nammineq innuttarisaminut tunngasortaanik, nunatsinni illoqarfinni inuiaqatigiit allat nunarsuarmioqativullu allat unammillerneqartariaqarput.