Naammagittaalliuteqartarneq pillugu malittarisassat

Imm. 1. Pilersaarusiorneq aamma nunaminertat atorneqartarnerat pillugit Inatsisartut inatsisissaat nr. 17, 17. november 2010-imeersumi § 56 naapertorlugu nunaminertamik atugassiisarnermut Kommunalbestyrelsip aalajangernera Naalakkersuisunut suliassanngortinneqarsinnaavoq. Naammagittaalliuutit Kommuneqarfik Sermersuumut nassiunneqassapput tassanngaanniillu kommunimi suliap suliarineqarneranut oqaasertaliilluni naammagittaalliuut Naalakkersuisunut ingerlateqqinneqartassalluni.

Imm. 2. Naammagittaalliuteqarsinnaasoq tassaavoq aalajangiinermi pineqartoq, kiisalu kinaluunniit imminut aamma suliap inernera pillugu annertuumik soqutigisaqartutut nalilerneqartoq.

Imm. 3. Naammagittaalliutissaq kingusinnerpaamik tunniunneqarsinnaavoq Kommunalbestyrelsip aalajangiineraniit sapaatit akunneri arfineq-pingasut qaangiutsinnagit.

Imm. 4. Kommunalbestyrelsip akuersissutaanik tigusisoq Naalakkersuisunit naammagittaalliortoqarnera pillugu nalunaarfigineqassaaq.

Imm. 5. Naammagittaalliuteqartarfiup aalajangiinera allaffissornikkut oqartussamut allamut suliassanngortinneqarsinnaanngilaq. Aalajangiinerli Kalaallit Nunaannit Eqqartuussivimmut suliassaqarfittut siullertut suliassanngortinneqarsinnaavoq. Suliap Eqqartuussivinni misissorneqarnissaanut piffissaliinissamut aalajangersaasoqanngilaq.

Imm. 6. Naammagittaalliuut Naalakkersuisunit kinguartinneqarsinnaavoq. Tassa imaappoq, naammagittaalliuut suliarineqarsimatinnagu, akuersissut tunniunneqartoq atorneqarsinnaanngilaq.