Kangerluup ornittagassanngorlugu ineriartortinnera

Kulturikkut oqaluttuarisaaneq sumiiffimmut pingaarutilik

Arsuup kangerlua takornariaqarneq ilisimatusarnerlu eqqarsaatigalugit soqutiginaatiliuvoq. Kangerluk nunatamigut immikkuullarissuteqarpoq sallertut assersuutitut Ikkami talut assersuutigalugit. Uumasoqarluarpoq naggorissuulluni timmiarpassuaqarlunilu umimmaqarpoq. Kalaallit Nunaata oqaluttuarisaanera tamaat eqqarsaatigalugu nunaqarfikorpassuaqarpoq – siulitta inuit, qallunaatsiaallu nunaqarfikorpassuiniit amerikamiut sakkutooqarfiinut kiisalu Ivittuut Kalaallit Nunaannilu sakkutooqarfik tamaaniillutik. Tamanna ataatsimut isigalugu pinngortitamik kulturikkullu misigisassanik assigiinngitsorpassuarnik tunniussassaqarpoq, kangerlullu kulturikkut oqaluttuarisaanikkut sumiiffimmuinnaq pinnani pingaaruteqartuuvoq.

Immikkortumi tamarmi periarfissat misissorneqassapput sumiiffimmiittullu, soorlu Ivittuuni aatsitassanik piiaanermi aatsitassanullu katersugaasivik suleqatigalugit, aaqqissuuteqqissaarneqassaput. Arsuup immikkoortumi takornariaqarnermut aallaaviunissaa eqqarsaataavoq – kangerlummi sulianut aamma nunap immikkoortuani tamaani sakkortuunut takornariaqarnermut aallaavittut, aammattaaq Ivittuuni Kangilinnguanilu illut atortullu allangutsaaliugassat ingerlaavartumik ingerlanneqarnerannut angerlarsimaffittut. Ullumikkut malunnarpoq immikkoortumi takornariat tassaasut kisimiillutik angalasut, umiarsuarmik takornariat immikkullu soqutigisaqarlutik takornariat, assersuutigalugu nuna imaluunniit timmissat immikkut eqqarsaatigalugit takornariat tamaanngartarnerat.

Kangilinnguani pingaartumillu Ivittuuni illoqarpoq atortoqarlunilu Kalaallit Nunaata oqaluttuarisaaneranut pingaarutilinnik: orsugiassiorneq Kalaallit Nunaannilu sakkutooqarfik.

Ivittuut aamma Kangilinnguit atorunnaarnerinut atatillugu illut atortullu sorliit kulturikkut oqaluttuarisaanermut ersiutitut allanngutsaaliugassaneri imaluunniit takornarianut unnuisarfiusinnaaneri pillugit isummertoqartariaqarpoq. Taamaattumik piffissami pilersaarusiorfissami inuussutissarsiornermut isumalioqatigiissitaq suleqatigalugu ornitassatut ineriartortitsinermi ataatsimoortumik pilersaarusiortogqassaaq takornariaqarneq ilisimatusarnerlu qitiutillugit.