Innuttaasut ineriartornerat

Akileraartarnermut inuunerissaarnermullu isumalioqatigiissitap nalunaarutaani ”Atugarissaarnerput inuunerissaarnerpullu – massakkut iliuuseqarfigisariaqarpoq” qupperneq siullermili qulequtanngorlugu allassimavoq ”killiffik periarfissaanngilaq”. Tamanna kommunimut ataatsimoortumik pingaarnertut ilusissap oqaasertalersorneqarnerani aamma tunaartarineqarpoq.

Matumani kommunimut pilersaarutip nassuiaatitaani kommunimi nunassittarneq nuttartarnerlu misissuiffigeqqissaarneqarput, kommunip pilersaarusiornissamut suliassai eqqarsaatigalugit paasisaqarfigerusullugit. Misissueqqissaarnermi paasisat pingaarnerit tassapput:

  • Nuuk aamma Tasiilaq inuttuseriarput, inoqarfiit allat tamarmik inukillisimasut
  • Inoqarfinniit inukillisuniit nuuttut illoqarfimmut qaninnermut nuuttarput tulliullugulu Nuuk nuuffigineqartarluni
  • Illoqarfiit nuuffigineqarsinnaasunik eqqaamiullit attanneqarsinnaasumik ineriartorfiunerusinnaapput, siulliullutik peeruttussaasut, eqqaata inuerunnera pissutigalugu, (assersuutigalugu Ittoqqortoormiit 0´ikkut qiteqqunneranni inuttusiartuinnarsimapput eqqaanilu nunaqarfiit inuerukkiartuinnarsimallutik. Taamanili innuttaasut annertuumik ikiliartuinnalersimapput)
  • Piffissami tassani nuuttartut amerlassusii aamma sumut qanorlu nuuttarnerisa kommune nunap ilaatut annerusumik annikinnerusumillunniit imminnut ataqatigiissutut isigineqartilersimavaa