Namminersorlutik Oqartussat soqutigisaat

Nuna tamakkerlugu pilersaarusiortarnerup nukittorsarneqarnissaanut suliniuteqarnerup ilaatut nuna tamakkerlugu pilersaarusiornermut immikkoortortaqarfik aamma Aningaasaqarnermut Naalakkersuisoqarfik, Namminersorlutik Oqartussat immikkoortunut soqutigisaannut assigiinngitsunut, inatsisitigut nalunaarusiatigut allatulluunniit pisortaqarfinnik isumaqatigiissutaasimasut aalajangersakkanut, allattuiffimmik suliaqarpoq, taassumalu imai tunngaviusumik kommuninut pilersaarusiortarnermut tunngavissanut, anguniakkanut piumasaqaatinullu tunngasuupput. Allakkiami ilaatigut naatsorsuutigisat pingaarnerit ilaatigullu anguniagassat arlallit aamma immikkoortukkuutaanit ataasiakkaanit piumasaqaatit allaaserineqarput. Anguniakkat piumasaqaatillu taaneqartut tamarmik periusissanut iliuusissanullu pilersaarutini pioreersuni, kiisalu inatsisini pioreersuni nassaarineqarsinnaapput.

Kommunimut pilersaarusiornermi Namminersorlutik Oqartussat soqutigisaat

’Kommunimut pilersaarusiornermi Namminersorlutik Oqartussat soqutigisaannut takussutissaq’-mi Namminersorlutik Oqartussani immikkoortukkuutaanit ataasiakkaanit anguniakkat piumasaqaatillu arlallit oqaatigineqarput. Kommunimut pilersaarummi imaattoqassaaq:

  • `Illuliornermut malittarisassat´-nit piumasaqaatit illut ungasissusaanni, annaassiniartarnerni ikuallattunillu qamisaanerni, aqquserngit titarneranni, aqquserngit nunaminertaanni kiisalu aalajangersakkani immikkuualuttuni sanaartukkat annertussusiisa naatsorsorneqarneranni pissutsit immikkut qitiutinneqarput
  • Nunaminertanik illersugaasunik, nunaminertanik atuinerit pillugit aamma qaartartuusiviit eqqaanni sanaartukkat pillugit aalajangersakkanik pingaarnernik imaqassaaq
  • Nunaminertanik illersugaasunik aamma mittarfinni, qulimiguullit mittarfiini “akunnittarfiinilu” aqqusinertigut angallannermit pillugit aalajangersakkanik imaqassaaq
  • Umiarsualiveqarfinnik inissiinerit, killeqarfilersuinerit tamakkulu aqqusinertigut angallaffigineqarnerat pillugit aalajangersaasoqassaaq
  • Telep atortuusiviisa eqqaanni nunaminertat illersugaasut isumannaallisaaffiusullu pillugit aalajangersaasoqassaaq
  • Tankeqarfiit eqqaani nunaminertanik atuinerit, nunaminertat illersugaasut, inissiinerit killeqarfilersuinerillu pillugit aalajangersaasoqassaaq
  • Erngup nukinganik nukissiorfiit inissinneqarnerat killeqafilersorneqarnerallu aamma imermik tigooqqaavinni nunaminertat illersugaasut, tassunga ilanngullugu sermimik piaaneq, pillugit aalajangersaasoqassaaq
  • Suliffeqarfinnik immikkut inissinneqarnissaannik piumasaqaatitaqarfiusunik inissiinerit killeqarfilersuinerillu pillugit aalajangersaasoqassaaq
  • Nunaminertanik mingutsitsisunik mingutsinneqarsimasinnaasunillu aamma nunaminertanik suliffeqarfinnik mingutitsisorujussuarnut atugassiissutigineqartunik eqqarsaatiginninnernik aalajangersaasoqassaaq
  • Allanngutsaaliuinerni eriagisariaqartunilu pissutsinik isumaginninnerni malittarisassanik, tassunga ilanngullugit pinngortitami naleqassutsinik sumiiffinnilluunniit immikkut eriagisariaqartunik, isumaginninnermi malittarisassanik aalajangersaasoqassaaq
  • Sumiiffinnik kulturikkut oqaluttuarisaanermut immikkut soqutiginaatilinnik aamma aatsitassarsiorfiusunik inissiinerit killeqarfilersuinerillu pillugit aalajangersaasoqassaaq

Nalinginnaasumik pinngortitat assigiinngitsunik isikkullit allanngutsaaliugaasullu pillugit malittarisassanik kommune eqqumaffiginnittussaavoq.

Tamatuma saniatigut Pinngortitamik illersuineq pillugu inatsisip nutaap kingunerisaanik nunaminertaq, kangerluk, kuuk taserluunniit kommunimi ileqqoreqqusani allanngutsaaliorneqarsinnaajunnaarput, akerlianilli timmissat erniorfiinik timmiaqarfinnillu illersuinissaq pillugu kommunimi malittarisassiortoqarsinnaavoq (kommunimi ileqqoreqqusat). Immikkoortumi `avatangiisinik pisuussutinillu ataqqinninneq´-mi nunap assinga kommunimi sumiiffinnik allanngutsaaliugaasunik takussutissiisoq takuneqarsinnaavoq.

Kommunimut pilersaarusiornermi Namminersorlutik Oqartussat soqutigisaat:

3_kommuninut_pilersaarusiornermut_
tunngatillugu_namminersorlutik_oqartussat_
soqutigisaasa_allattorsimaffiat_2015.pdf