Kapisillit

Pingaarnertut iluseq

2015-mi januaarimi Kapisilinni aalajangersimasumik najugallit 65-iupput. Nunaqarfik ukiut ingerlanerini 2003-mi 97-inik inoqarsimagaluarluni malunnartumik inukilliartorsimavoq. Inuisa akornanni meeqqat aamma inuusuttut inuussutissarsiuteqarsinnaasut ikittuinnaapput. Nunaqarfimmi taamaalilluni ilaqutariit inuusuttut ikittuinnaapput utoqqaallu amerlallutik.

Inissiaqarfiit

Nunaqarfimmi najugaqavissut nutserput – annerusumik Nuummut – inissiallu sunngiffimmi illunngortinneqartarput. Nunaqarfiup inuttussutsimigut ineriartornera tunngavigalugu kommunalbestyrelsimit nalilerneqarpoq Kapisilinni nunaminertanik nutaanik inissianut siunertalinnut atugassiisoqarnissaa pisariaqanngitsoq.

Inuussutissarsiuteqarfiit

Qeqertarsuatsiaanisulli inuussutissarsiutini saarullinniarneq piniarnerlu tunngaviupput, tassanissaaq aalisakkat kinguariaateqarnerat ilaatigut aalisakkeriviup matuneranik kinguneqarpoq.

Kissaataavoq Kapisillit takornariaqarnerup iluani ornittagassatut ineriartortinnissaa. Siunnersuutigineqarpoq nunaqarfiup qeqqata qanittuani nutaamik 150 m2-it missaannik angitigisumik sanaluttarfiliortoqarnissaa, nunaqarfimmi inuit sanaluttartut massakkut 5-10-t atugassaannik. Ullumikkut nunaqarfimmi mersortarfeqareerpoq. Eqqarsaataavoq sannaviup tikeraanut ammatinneqarnissaa taamaalilluni tunisassiortup pisiniallu akornanni toqqaannartumik attaveqatigiinneq pilersinneqassammat, takornariap sanalussinnaanera periarfissaalluni eqqumiitsuliortullu sulineri isiginnaarsinnaallugit.

Nunaqarfimmi aamma tunitsivimmik fabrikkeqarpoq. Talittarfiup 2 meterinik allineqarnissaa aamma kissaataavoq tunisassiorneq talittarfimmilu suliat allat inissqarluarniassammata.

Angallanneq, teknikkimut avatangiisimullu tunngasut

Nunaqarfik Nuummiit sapaatip akunnikkaartumik maj-januar umiarsuaqartarpoq.

Angallannermut periarfissat pitsaanerusut qulakkeerumallugit heliportimut nutaamut nunaminertamik inniminniisoqarpoq, sananeqarnissaa pilersaarutaanngikkaluartoq.

Allanngutsaaliugassatut soqutigisat

Allanngutsaaliugassatut soqutigisat eqqarsaatigalugit illut allanngutsaaliugassat ingitseqqusaannginneri, aamma illup illuliortaatsikkut iluseqqaavata sannaatalu ataqqineqarnissaat pillugit aalajangersaasoqarpoq.

Nunaminertat sanaartorfiunngitsut aamma nunaminertat sukisaarsaarfiusut

Kapisilinniit 1 km-it missaanik kangisinnerusumi Nuussuaq inissisimavoq, sunngiffimmi illuaraqarfiusoq. Nunaannarmut pilersaarummi nr. 2-mi, Nuup Kommuneani illuaqqat, nunaminertap sunngiffimmut tunngasunut ukioq naallugu najugarineqarsinnaanera periarfissaatinnagu aalajangersagaanera attatiinnarneqarpoq.

Piffissami pilersaarusiorfiusumi ataatsimoortumik pilersaarusiornissaq qitiutinneqassaaq, nunaminertanut sukisaarsarfiusunut, nunaminertanut sanaartorfiunngitsunut aamma sunngiffimmi illunut aalajangersaasumik. Aamma Nuummiit Kapisilinnut qamuteralammik attaveqalernissamut aalajangersaasumik, taanna pisuffittut aqqutaani uninngaarfilerlugu aamma atorneqarsinnaassaaq.