Imm. 1. Nunaminertamik atugassinneqarnissamut qinnuteqarneq qinnuteqaateqarnermut immersugassamik naqeriikkamik immersuinikkut pisarpoq, taanna Kommuneqarfik Sermersuumut imaluunniit kommunip nunaqarfimmi immikkoortuanut imaluunniit kommunip allaffianut nassiunneqassaaq. Qinnuterqarnissamut immersugassaq Kommuneqarfik Sermersuumi Sanarfinermut Avatangiisinullu Ingerlatsivimmit (Nunaminertanut oqartussat) piniarneqarsinnaavoq. Qinnuteqarnermut immersugassaq aamma kommunip nittartagaatigut aaneqarsinnaavoq. Aamma NunaGIS aqqutigalugu nunaminertamik atugassinneqarnissamik qinnuteqartoqarsinnaavoq.
Imm. 2. Qinnuteqartumit qulakkeerneqassaaq immersugassap tamakkiisumik aamma eqqortumik immersorneqarnissaa aamma oqartussaasunit attuumassuteqartunit tusarniaasoqarsimanerata qulakkeerneqarnissaa isumagisussaatitaavaa.
Imm 3. Kommunalbestyrelse nunaminertamik qinnuteqaatip suliarineranut paasissutissanik allanik piumasaqarsinnaavoq, aamma:
- Suliap aningaasaqarnikkut piviusunngortinnissaanut uppernarsaateqarnissaq, nammineq aningaasaliisinnaaneq pillugu bankip qularnaveeqqusiinera, taarsigassarsisitsisarfiup attartornissaq pillugu neriorsuinera aamma/imaluunniit kommunimit aamma Namminersorlutik Oqartussanit tapiiffigineqarnissamik neriorsuinertut ittut
- Pilersaarusiornermut atortussani illup naqqata silataatalu titartarneri nunataanut naleqqussarneqarsimassapput kiisalu suliamut nalinginnaasumik suut pisariaqartumik aalajangiuttariaqarnersut ilaatinneqassallutik, matumani nunaminertap atorneqarneranut paasissutissat aammalu kommunimut pilersaarummut naapertuutissasoq
Imm. 4. Aalajangersakkanut sukumiisunut attuumassuteqanngitsumik immikkoortumi nunaminertamik atugassiissuteqartoqarsinnaassappat, qinnuteqaat tamanut nalunaarutigalugu sivikinnerpaamik sapaatip akunnerini marlunni tamanut tusarniutigineqassaaq. Tamanna aamma immikkoortumi nunaminertamik atugassiisarnermi aalajangersakkanut sukumiisunut atuuttuusunullu naapertuussimatinnagit immikkut akuersissummik qinnuteqartoqartillugu atuutsinneqartarpoq. Piffissaliunneqartup qaangiutinnginnerani innuttaasoq kinaluunniit qinnuteqaatigineqartumut akerliliissuteqarsinnaatitaavoq. Qinnuteqaammik suliaqarnermi akerliliissutigineqartut ilanngutissallugit Kommunip pisussaaffigaa.
Imm. 5. Nunaannami nunaminertamik atugassiisoqartinnagu (immikkoortunut K-O) qinnuteqaat tamanut sivikinnerpaamik sapaatit akunnerini pingasuni saqqummiunneqassaaq aamma oqartussanut attuumassuteqartunut allanullu tusarniaassutigineqassaaq, takukkilli § 44, imm. 2 aamma 4 Inatsisartut inatsisaat nr. 17.
Imm. 6. Tamanut saqqummiussinissamik piumasaqarneq pinngitsoortinneqarsinnaavoq, nunaminertat annikinnerit, illut, atortut imaluunniit nunaminertamik allatut atuinermi kiisalu atuisinnaanerup tunniunneqarneratigut. il.il. takuuk § 42, imm. 3 aamma § 44, imm. 4 Inatsisartut inatsisaanni nr. 17.
Imm. 7. Kommunalbestyrelse qinnuteqaammik itigartitsisinnaatitaavoq, imm. 3-mi paasissutissat taaneqartut Kommunalbestyrelsip piffissaliussaata iluani tunniunneqanngippata.